𠵱家E組形勢真係相當混亂，4隊球隊都有機會出線，未踢完最後一輪嘅賽事，都未知邊兩支球隊可以晉身16強。
今日我嘅推介場次係捷克對意大利。捷克今場可謂非勝不可，假設和波嘅話，而另一邊加納又贏波，意大利同加納就會雙雙出線。
意大利唔係咁穩陣
就算加納對美國和波，兩隊就同分，到時都仲要睇吓得失球差，先知道邊隊可以晉級16強，所以今場對捷克嚟講，和波真係未必咁有着數。相反意大利其實都唔係想像之中咁穩陣，如果呢場輸咗畀捷克，而加納嗰邊又贏埋美國嘅話，意大利將會黯然出局，到時真係喊都無謂啦。
今場賽事對兩隊都非常重要，實在係不容有失。喺咁嘅情況之下，我就寧願揀番𠵱家受讓半球嘅捷克下盤，話晒和波都有錢收。
另一場推介場次係克羅地亞對澳洲。克羅地亞上場0：0悶和咗日本，令到出線形勢相當不妙，今場一定要贏波先可以出線。相反澳洲只要和波就可以晉級。不過仲有一個可能性，就係日本大數巴西，但呢個可能性好低。
克軍守強攻弱捧澳洲
睇過兩隊較早前嘅表現，克羅地亞就好明顯守強過攻，上次連日本都攻佢唔入，今場對住澳洲仲要讓平/半，我一定揀下盤澳洲。
陳樹鵬（阿鵬）
有線球彩台主持
電郵：[email protected]