見車講車：我估最多250個
不要小看200個氣球，每個圓形氣球之間都有空間，你試試將200個氣球放在家中，就知場面非常震撼，以我們的經驗，同級的日本7人車，最多可放入179個氣球（連埋司機位），但R350L只用了中排和後排的空間，就載了200個，還未用上前座呢。其實R350L還可放得更多，只是我們沒有氣力再泵氣球，照我看，真的要塞爆，250個氣球是絕對沒問題。這個測試不是最準確，但可以簡單看到R350L和對手的比較。
人說：「R350L得6個座位，舒適不及S-Class，又未夠8座的Vito實用，買來托呀？」畀着我，我會買R350L來載狗去沙灘、俾個保鑣去接放學、俾工人去超級市場入貨，幾有型。平治係有錢人玩意，無錢嘅係唔會明白，亦唔好問。新S-Class車價最平130萬，但個個爭住買，虛榮係無得解。
記者：伍旋卓
車廂：獨立機艙座椅唔會坐到腳痹
「點解要揀Benz？」十居其九都答：「型啦，舒服啦。」以上2個已成為平治的標記，新R350L令人知道平治都有實用一面。這架新車集跑車、旅行車、SUV、MPV優點於一身，但我這個死硬派始終認為，旅行車始終都要以車廂實用率同乘坐感行先。為了測試車廂有幾大，我們做了個實驗，將中排同後排座位塞滿氣球，經過一輪繁複工序後，足足用了200個氣球，才能把整個車廂填滿。試完車廂，再試舒適度，講真，中排座位必定是全車最舒服的必坐位，兩張有如頭等機艙的獨立座椅，座椅與前排座位足有92cm距離，後排同中排相距都有84cm，坐長途車唔怕屈住隻腳，坐到腳痹。
外形：車長唔等於難揸
女士們總覺得要舞得掂1架又大又長的旅行車仲難過揸坦克，其實並不是想像中難，只差在你識唔識揀！平治R350L又長又闊，但當坐上司機位時，睇位或操控都並非如想像中咁難，無尾設計加上倒後泊車感應器，倒後泊位並無難度。3,498ccV6引擎，在駕駛一段短時間後，就完全上手，放膽去試，可以感受到內藏的跑車基因，但這些基因，還是要到中段時才較為明顯！
輸出：起步略嫌未夠力
新車糅合了跑車優點，但身形較大，所以唔會用試跑車的心態去試，收油再踩油，起步時有點遲疑，未夠爽快，但中段時，速度感湧現，愈去愈順暢，說到尾它始終是部適合一家大小合家歡的多用途旅行車，加入了跑車元素，當是Bonus已算不錯，要有跑車速度同操控感，不如買架SLK！記者：黃婉冰 攝影：伍慶泉 Model：Vicky
平治R350LSpecification
引擎：3498ccV6DOHC
馬力：272hp/6000rpm
扭力：350Nm/2400-5000rpm
傳動：7前速自動波
車輛提供：仁孚行（28957339）
供車資料：
車價：$798,000
利率：3.98%
月供：$19,271×48期