呢排孫柏文同大家一樣，一邊睇精采嘅世界盃球賽，一邊睇更加刺激嘅電盈Show，始終都係嗰句，對我哋特區人民嚟講，喺貼身娛樂性角度上，「Ronaldinho」始終比不上「Richardinho」。故事發展到呢到，快快趣總結。
楷哥收到佢「太傅」（mentor）馬世民（SimonMurray）領導嘅澳洲番鬼集團（Macquarie），話要娶佢個女做老婆，咁消息一出，就有個患有戀亞癖（AsianFetish）嘅花旗國佬（Newbridge）都話會示愛。不過，個女早排已經同個大陸仔（中國網通）訂咗婚，當時楷哥仲要簽約話，個女有乜嘢風吹草動，都要得大陸仔同意先至可以進行。
故事最新發展，聽講係話楷哥宣佈「婚約」冇效，叫個大陸仔去「食自己」，話個女嫁畀邊個，就只可以從個女嘅利益出發，來個全股民公投。首先，凈係講「楷哥一定知廢婚約會激死大陸仔個阿媽，都要照做，為乜？唔通楷哥造反？見到大陸仔屋企唔識科技，所以要求『全球公審大陸仔』？」都可以講三、四、五日。
做信息渠道冇得做
不過今日，我想用隻金手指為大家篤嘅，唔係楷哥點樣會賣走電盈嘅固網同nowTV收費電視平台，而係賣走之後楷哥會搞啲乜。大家可能會問：「點解孫柏文咁肯定楷哥賣女成功？」因為我覺得，楷哥搵班番鬼佬媾佢個女，都係想迫婚，因為楷哥覺得大陸仔訂咗婚咁耐都未結婚，實在冇誠意。
其實楷哥今次同我一樣，睇到科技世界變，知道固網同nowTV收費電視平台只會愈來愈唔值錢，所以搵辦法抽身。大家可能會再問：「點解會愈來愈唔值錢？」問得好！大家都知道我對互聯網嘅威力，毫不猶豫。
作為醒目fan屎嘅你，都一定聽個DigitalConvergence呢個概念，其實呢個意思就係大家遲早乜嘢聽得、睇得嘅嘢都會經互聯網聽同睇。電影、音樂、「巴士阿叔」短片、孫柏文非常精采嘅文章，大家都通通可以經互聯網聽同睇。咁大家都知道，今時今日要上互聯網實在有太多途徑，互聯網服務供應商咁多，自然引發激烈嘅競爭，用固網提供互聯網服務就會愈來愈唔值錢。
仲有，如果大家喺互聯網乜嘢都睇晒，一個收費電視平台又會有乜用？呢個只要睇我教大家點樣用互聯網嘅ppstream.com免費睇世界盃，都會明白。即係話做「信息渠道」（contentdistributor）嘅生意係冇前途。所以就連擁有政府發牌嘅大氣電波（transmissionspectrum）或者戲院等等都會係冇前途。
做資訊供應商先有前途
大家可能會加問：「做『信息渠道』冇前途，咁係唔係做『資訊供應商』（contentprovider）生意先至有前途？」冇錯！呢個係花旗國佬MarkCuban，佢曾經話過，佢以前做「信息渠道」Broadcast.com，𠵱家就做「資訊供應商」生意走去拍電影。不過我哋大中華地區，同花旗國最唔同嘅地方，就係我哋唔係好尊重知識產權，「資訊供應商」做嘅知識產權好快就被人偷。「資訊供應商」點樣研究反盜版嘅技術，只要有足夠嘅時間都會被人擊破。
大家最後可能會問：「咁楷哥諗住點樣搵做『資訊供應商』嘅錢呀？」簡單啦！楷哥只要供應嘅知識產權，會因為時間愈來愈唔值錢咪可以。例如，一場球賽，如果唔係現場直播，係唔係唔值錢呢？不過，大家唔好以為楷哥會走去買成個英超聯番來，因為會太貴。大家諗唔諗到仲有乜嘢資訊，係會因即時直播先至值錢？冇錯，就係財經資訊，所以大家都見到楷哥嘅nowTV唯一嘅原創content就係佢嘅財經台（呢個一定唔會跟固網賣）。亦都可以明白，點解楷哥會對《信報》咁有興趣啦。點呀楷哥，孫柏文有冇講錯？
孫柏文