有班師奶兵團學人炒樓，喺東涌映灣園中伏，俾人殺訂夾追差價，呢件事轟動地產界，但住宅炒唔起，工廠大廈就有人諗，近月市道持續暢旺，尤其工商綜合大廈最受追捧，好似長沙灣經達廣場，1星期內先後有2層樓全層連環易主，涉資一共1700萬元，帶挈兩業主賺番筆。
華華聽中原九龍西工商部營業經理梁志輝講，位於長沙灣長裕街12號的經達廣場，其中高層全層樓面約2727方呎，剛以800萬元售出，呎價約2934元。該樓層目前分間做4個單位，半數交吉。原業主持貨約5年，獲利290萬元。可見香港地要炒實有得你炒。
另一中高層全層，一樣呎數，近日亦以900萬元交吉易主，呎價約3300元，業主6年賺420萬元；買家認為該廈全層放盤少，預計呎價將可穩步上揚。