近期禽流感肆虐全球，大家都聞雞色變，各地都做足預防措施，提防禽流感蔓延。舉行世盃嘅德國當然唔例外，佢哋嘅禽流感警報仍未解除；之不過班法國球迷就一於少理，死都要「攜雞」入場。
因為公雞係法國隊標誌，凡親隊波去邊度比賽，班忠實fans都會帶埋隻公雞入去睇波，希望幫隊波帶嚟好運咁話。不過，班法國球迷好應該為他人設想吓。禽流感唔係嘢小，𠵱家風頭火勢，仲帶埋隻生雞入場，好似我呢類咁怕死嘅人，實俾佢嚇到雞飛狗走啦！如果坐喺呢班球迷隔籬，無端端俾隻雞感染嘅話，呢單新聞直頭可以上頭條！
大家試諗吓，每隊波嘅球迷都帶真動物入場，好似美國帶隻鷹、澳洲帶成班袋鼠嘅話，看台何其壯觀。照我睇，佢哋可以即刻搞番一場「動物奧運會」㖭！
彭浩翔電影導演