是日港股隱隱約約跟住日股走，中午日股跌幅擴大，港股跌幅亦擴大。下晝港股開市前，日股幾乎冇跌，港股又好番。恒指全日有50點進賬，高低波幅148點，今時今日唔算大。
暫時每日高低相差一二百點，閒過立秋，唔易向一個方向猛衝。市升時追C輪或市跌時追P輪，好易領嘢。做嘢都係保守啲穩陣。無論做邊樣，切忌衝動。但好多時，炒家鍾意高價先至追C輪，跌到寒寒哋嗰陣則走去買P輪，定力唔夠，做咗輸家。
恒指C輪4783：恒指C輪4783升3.8%，收24.6仙。等機會，等隻輪回跌至22仙上車。4783喺8月尾夠鐘，溢價3.4%，槓桿率15.9倍（有效10倍），引伸波幅27%。想搏殺啲，揀7月底夠鐘嘅4446，現價11.6仙，喺10仙以下上車。隻輪溢價2.5%，槓桿率34.6倍（有效19.3倍），引伸波幅20%。
恒指P輪9018：恒指P輪9018跌3.9%，收20仙，等跌到18仙上車。隻輪12月中到期，溢價5.5%，槓桿率19.6倍（有效8.8倍），引伸波幅19.4%。
建行C輪2293：建行（939）現價3.275元，見番上周低位3.20元買C輪2293，到時嘅價約係22.5/23.0仙。建行似逐漸見底，咪諗P輪住。
章盛