女仔睇波鍾意睇靚仔，男人其實都一樣係㗎，不過佢哋同時會兼睇埋球技，無女仔咁單一化。八方同白鴿黨肥仔明講起今屆世界盃新星，佢就睇好西班牙新王子，今年只得22歲、效力馬德里體育會嘅費蘭度托利斯Torres。
肥仔明話，呢個新星唔單止腳法好，而且仲幾靚仔㖭，都算係舊金童子魯爾嘅接班人喇，而且仲有機會係今年世界盃嘅最佳新球員得獎人。咁又係呀，Torres唔覺唔覺已經入咗三球，話唔定都係神射手候選人之一㖭，肥仔明押注落去都算係有眼光。不過，佢覺得今年最有冠軍相，非德國莫屬，因為夠穩陣，八方又睇吓佢會唔會跌眼鏡啦。
至於民協馮檢基睇世界盃都睇到腳癮起，正邀請各大黨派一齊踢番場友誼波；民主黨已經應承，但民建聯就無回音，唔通佢哋入面無好波之人？
傳真︰2623-9278
電郵︰[email protected]