睇過有線電視《怪談》、聽過香港電台《瘋Show快活人》都知梁思浩把口了得，今日發現佢多一個優點，就係廚藝都一樣咁得。今次示範嘅四餸一湯貌似複雜，其實只要跟住思浩煮，無難度！我最鍾意碗湯，材料平得嚟，碗湯嘅鮮味加濃味拍得住大酒樓，仲有蜑家特色……做佢老婆真好！
記者︰劉昱蘭
攝影︰伍慶泉
金沙醬炒翠玉瓜 醬汁好易整
夏天當造的新疆翠玉瓜，齋炒可能無乜特色，加個金沙醬口味頓時豐富好多。出面食黃金蝦、黃金蟹，就係靠呢個金沙醬。唔好以為好難整，蛋黃加雞湯就已經整到。
材料：
翠玉瓜2個、甘笋少許、蒜茸少許、蠔油1湯匙、糖11/2茶匙、鹹蛋黃6隻、雞湯2湯匙
價錢︰$20/4人
需時︰15分鐘
翠玉瓜$4/斤（a）
甘笋$6/斤（a）
蒜頭$4.8/斤（b）
簡易法：
1.翠玉瓜及甘笋切片，蒜茸起鑊後，炒翠玉瓜及甘笋，落蠔油及1茶匙糖調味；
2.鹹蛋黃落鑊壓碎煮成醬，見變乾時加少許湯，成醬後加半茶匙糖，再落翠玉瓜及甘笋略炒即成。
貼士︰
金沙醬整得愈碎入口愈有沙粒的感覺，可先將蛋黃剪開較易壓碎。
芙蓉奶蛋炒蝦球 幼滑靠淡奶
出面食到的炒蛋又軟又滑，返到屋企就點煮都煮唔到，秘訣原來喺啲淡奶度。煮成奶蛋狀夠Creamy，食落好似食緊蛋味啫喱咁正，仲有蝦肉彈牙的咬口，真係唔煮唔知咁好食。
材料：
蝦8両、韭黃1両、雞蛋6隻、淡奶3湯匙、鹽少許
價錢︰$30/4人
需時︰15分鐘
蝦$56/斤（a）
韭黃$10/斤（a）
雞蛋$9.9/20隻（c）
簡易法：
1.蝦剝殼，韭黃切段，取出6個蛋黃和3個蛋白，打蛋加淡奶；
2.用猛火炒蝦約半分鐘後撈起，倒1/3蛋漿煮至奶蛋狀便可將其餘的蛋漿、蝦及韭黃加入，熄火略炒加鹽調味即成。
貼士︰
最後的2/3蛋漿要熄火用餘溫煮成，咁先夠Creamy。
冰涼夏日鴛鴦雞 一碟兩味
呢個有西菜特色的鴛鴦汁，一碟兩味好過癮，甜甜酸酸最啱呢個天時。試味時，我就覺得酸味啱啱好，但攝影哥哥食到揦埋口面，唔食得酸就要自己調好個醋同糖嘅份量喇！
材料：
橙2個、檸檬2個、炸粉1/4包、雞扒4塊、白醋2湯匙、糖4茶匙
價錢︰$20/4人
需時︰20分鐘
橙$10/4個（b）
檸檬$2/個（c）
雞扒$9/磅（a）
簡易法：
1.橙刨皮後榨汁，將橙汁倒落果皮，檸檬重複以上步驟處理，炸粉開漿，雞扒蘸炸粉漿落鑊炸；
2.兩個果汁分別加入1湯匙白醋及2茶匙糖略煮，雞扒切條後，一半加橙汁，一半加檸檬汁即成。
貼士︰
炸雞扒時要Keep住將粉渣夾出，令油唔會咁易有燶味。
蜑家米水湯 平得嚟清甜
蜑家人節儉，將打魚時黏住喺網邊無人買嘅梭羅魚仔做材料，就連洗米水都唔放過，但就係用呢兩樣嘢，煲出嚟嘅湯出奇咁清甜，消暑得嚟又唔浪費。
材料：
白米5杯、絲瓜1斤半、梭羅魚1斤、蜆肉、冬菜各半両、鹹魚乾及鹽少許
價錢︰$20/4人
需時︰40分鐘
絲瓜$7/斤（a）
梭羅魚$7/斤（a）
蜆肉$10/包（a）
簡易法：
1.以約10碗水洗米，絲瓜切度，白鑊煎梭羅魚後，加米水慢火煮約25分鐘至奶白色；
2.隔去魚，加4碗水後，再落蜆肉2両、冬菜、鹹魚乾及絲瓜猛火煮15-20分鐘，滾時收細火，加鹽及餘下的蜆肉即成。
貼士︰
思浩話米水浸得愈耐，散熱功效愈好。另外如果唔想用多骨嘅梭羅魚，可以用其他小魚仔代替。
煙花魚 炸皮夠香口
思浩話近月桂花魚開始排卵，夠肥大，要整番條試吓，但我好唔鍾意食魚，更加勁憎滑潺潺嘅魚皮，咁思浩就諗咗個桂花魚連皮炸，又幾香口喎！
材料：
桂花魚2斤、古月粉少許、鹽1/2茶匙、蛋1隻、生粉適量、蘆笋6條、五柳醬4湯匙
價錢︰$35/3人
需時︰20分鐘
桂花魚$10/條（a）
古月粉$6.9/50克（b）
蘆笋$11.9/200克（c）
簡易法：
1.桂花魚洗淨去骨後，起肉連皮切成6塊魚柳，肉面切格仔紋，加古月粉及鹽醃10分鐘；
2.打蛋，魚柳蘸上蛋漿及生粉，油煮滾後落鑊炸至起花；
3.蘆笋去皮汆水，以少許油、鹽略炒伴碟，魚柳加五柳醬或蘸點食用即可。
貼士：
切格仔燜時要小心，唔好拮爛魚皮，爛咗就炸唔到一個波形。生粉一定要均勻及夠薄，否則口感會唔好。
註：所有價錢以6月21日為準
（a）灣仔鵝頸橋街市
（b）軒尼詩道惠康
（c）集成中心百佳