非洲黑色勢力，近屆世盃都畀到球迷驚喜，好似上屆塞內加爾，同以往尼日利亞同喀麥隆咁，不過今屆非洲球隊似乎有啲跌watt，最好嘅科特迪瓦慘被編入死亡之組，𠵱家最有機會入次圈，就係今晚同美國打生死戰嘅加納。
E組形勢都算混亂，意大利攞住4分，捷克同加納各有3分，美國1分，基本上加納今仗只要贏美國，就肯定出線，鬥志唔使懷疑。雖然加納今場有前鋒基恩停賽，不過加納最強係中場線，好似艾辛、艾比亞等爛打球員，前鋒只係做簡單工作，對攻力無咩影響。
美國球員力有不逮
相反美國停賽問題更嚴重，今場有2個球員停賽，加上上仗對意大利，半場時間打少1個，體力嚴重透支，講真要雷拿、麥比迪呢啲老將連搏3場，真係唔樂觀；加上美國今仗一定要贏先有晉級希望，焗攻反而益晒加納，加納讓平/半，真係信心之選。
同日再推介條大細2串1，捷克對意大利，又係大波可期。意大利原本只要和波就可以出線，不過球迷都知，呢支藍軍後防已經今非昔比；納比都知死守唔係好有把握，既然捷克後防冇咗大將烏化奴斯，意大利點都想攻番一兩球，穩定出線席位。
捷克上仗令人失望，老將搏得盡，考慮到呢場可能係尼維特、普波斯基等最後一場世盃比賽，點都搏埋條老命，鬥攻博入球大。
尾場日本對巴西，日本要贏先有出線希望，其實有點天方夜譚，係人都知日本教練薛高同巴西有咩關係，巴西今仗點都賣番個人情畀你，不過以日本後防，又點抵禦到巴西嘅鋒力，巴西之前2仗都開細，不過今場個大反而壓低至1.6倍，拗吓頸揀個大。
牽牛