小初啱啱講完利信達（738）業績佳，但成交唔夠。隻股昨日即刻大升11.11％，收1.20元，成交金額增加至386萬元。
利信達成交雖然仍然唔算大，但喺淡靜的市況中，加上升幅唔細，其實表現唔差。
經紀黃話，聽講公司出完業績後，不停進行活動，努力改善與投資者關係，所以無論股價同埋成交量都即刻有反應。不過，隻股失驚無神咁活躍，唔排除稍後可能趁勢抽水。
另外，航運股已經好耐無人炒作，但太平洋航運（2343）昨日表現相當靚仔，升3.15％，收3.275元，成交股數497萬股，金額1609.9萬元。
經紀黃話，雖然早排有人傳佢可能賣盤，但公司即時停牌發通告否認，今次股價有異動，其實係有證券行幫佢搞過一次推介會，仲話公司order已經接到去2010年咁勁云云。
雖然太航無論業績同本數簿睇落都唔差，但問題係大股東過去多次減持，實在令投資者有戒心。
慕容小初