緋聞不斷的吳卓羲，近日被指放電狂追合作拍劇的港姐徐子珊，吳卓羲否認有拖實對方的手，不過就多得徐子珊拍被姦戲受傷，帶挈自己放假一天。而楊思琦就懶理同劇演員的拖手緋聞，只顧打包拜過神的燒豬腳回家與小狗一同享用，新一代慳妹果然非她莫屬。
吳卓羲、徐子珊、廖碧兒及楊思琦等昨日在將軍澳電視廣播城，為無綫新劇《突圍行動》進行開鏡拜神儀式，一眾演員祈求拍攝順利。
粉面撼門留痕
一向是非及緋聞多多的吳卓羲，近日被雜誌指拍劇期間向徐子珊放電，吳卓羲昨日對有關報道連聲否認，他說：「劇情講我哋拍拖，拖手係導演要求，其中有場戲講我勇救被人強姦嘅子珊，佢重受埋傷，都多得佢帶挈我放咗一日假。」
徐子珊就表示左臉的傷亦大致好轉，她說：「嗰日拍場強姦戲，塊面撼咗埋道門，𠵱家已經消晒腫，不過重有一條青色瘀痕。」
「我有六對父母」
被封為新一代慳妹的楊思琦，昨日將拜完神的燒豬腳打包回家與小狗一同享用，她說：「我會用啲燒豬腳嚟煲粥畀自己食，啲煲過嘅燒豬腳就畀屋企嗰七隻狗咬，等佢哋唔好成日咬爛啲枱腳、櫈腳，一物二用。我唔介意人哋話我慳妹囉！」
至於廖碧兒則回應日前被雜誌指與Cookies相約食飯博出碟，她說：「我嗰日係同爹哋、媽咪一齊食飯，雜誌都登埋我媽咪張相啦，都唔係好明個報道講乜，不過都習慣咗，成日都會俾人認錯屋企人，我計過，𠵱家大大話話喺雜誌出現過六個爹哋同六個媽咪。」
採訪：卓美娟 攝影：葉君海
