採訪隊推介
聰仔心水：意大利W
華度心水：巴西勝2:1
呢日打完南韓對法國，球場邊撞到個以為南韓行家，同佢講聲「大韓民國好波」，點知佢笑笑口話係日本人，真係唔好意思嘞，鬼叫你又生得似韓國仔咩！
呢位日本行家中原先生，其實亦被南韓喺比賽中嘅作戰精神，以及南韓球迷嗰份熱情感動到，轉頭同華度講，嚟緊佢哋對住大師兄巴西嗰場波，一定要落足眼力留意，絕對唔輸蝕得畀韓國人！
據中原先生所講，日本對巴西呢場F組最後一輪分組賽，將會有大量日本球迷到場打氣，就連到場採訪嘅唔同性質日本記者，都有過百人。日本人一來希望球隊奇迹地擊敗巴西，博到個16強席位返嚟；二來巴西波對於日本人嚟講奉若神明，日本隊踢法亦有多少仿效森巴足球，叫聲「大師兄」都好應該，當睇好波捧場亦值得。
巴西冇必要搏命
華度知道人多有氣勢，但又未必係好做事，況且呢個世界巴西躉都唔少。德國博彩公司就普遍睇好巴西呢場贏到1球以上，比較足智彩嘅「讓球主客和」「客勝」隔夜仲有1.75倍，呢邊一早就得番1.55倍。但講到計數，華度始終都係對亞洲莊家比較有信心；馬會個「客勝」好分咁多，反而「和局」就同呢邊差好遠。加上呢場巴西無必要搵命搏，寧願敲吓巴西小勝。
文：華度