近年事業插水嘅許志安，最近被傳以超低價踢走方中信，接拍無綫新劇《肥田囍事》，同暴肥35磅嘅胡杏兒飾演情侶，諗住挽救人氣。但估唔到安仔10年冇幫無綫拍劇，風頭依然不及肥妹仔胡杏兒，每次出現女方都成為焦點人物，自己就慘成人肉布景板。
事業失意，難怪安仔近排雖然日夜開工忙拍劇，但都忍唔住夜麻麻出嚟買醉，前晚佢就喺緋聞女友兼女助手「細佬」開設嘅酒吧鐵竇劈酒澆愁。
派司機出門交涉
前晚約九點鐘左右，戴漁夫帽、着衞衣同板仔褲嘅安仔坐住七人車，到位於跑馬地綿發街嘅BENSONCRAB&WINE洋酒專門店買咗支靚紅酒，跟住頭耷耷快步上車，直駛「細佬」喺中環歌賦街開嘅酒吧。只見安仔一落車就飆入店內，仲同司機及一名男伴坐最隱蔽嘅角落位，至於「細佬」就未見芳蹤。
坐坐吓，安仔突然搬枱，調咗去近門口嘅位置。當時三人都係飲紅酒，但已經飲清光，呢個時候面紅耳赤嘅安仔昅到門外有記者影相，即刻用手臂遮面，然後派出司機同記者交涉，仲話：「你哋邊間㗎？冇乜嘢，我哋傾偈啫。」係囉，既然男人老狗傾偈冇乜嘢，唔知點解安仔梗係左閃右避，「冇面」見人呢？
