星期六下午去跑馬之前，接到一個電話，正一阻頭阻勢，不過唔聽唔得，因為一位美國朋友打嚟，傾吓未來生意合作嘅可能性。有生意都留番星期一先至傾啦，不過人哋關照，點都要應酬吓。
講完公事，美國佬話想八卦吓，佢問：「以前我喺香港工作之時，見過一次蒙妮嘉王，呢幾日我聽到佢有新聞，學跳舞嘅學費高得驚人，究竟點解？」左丁山都係自報紙睇到報道啫，不知詳細情況，不過所有中環賓架都追讀單官司新聞，人人都講，我哋點都知得多過美國佬嘅。向佢講完，順便問番一句：「你哋紐約、三藩市啲名媛，闊太有冇爭住學跳拉丁舞？」
美國佬話：「應該都有嘅，不過唔係好癲啫。紐約豪門闊太現在流行爭出鋒頭嘅方法係鬥捐錢做甚麼榮譽贊助人，例如藝術展覽、管弦樂團、芭蕾舞等等，多數與文化藝術一類嘅高檔活動有關，值得香港啲名太太學習。你話佢哋附庸風雅都好，總之佢哋肯出錢，令到文化演藝界有生氣。」
人哋咁有品味，香港人有排學，或者如果西九龍文娛藝術區建設好之後，有合乎國際標準嘅演藝場所畀國際巨星一展所長嘅話，啲名媛會交少一半拉丁舞學費，用另一半嚟贊助文化藝術呢？希望呢個想法唔係發夢。講真，莫講話一億二千萬，畀一半用六千萬嚟贊助香港管弦樂團，呢個樂團肯定會進步到連李歐梵大教授都拍掌讚好，爭取成為亞洲第一。
講完電話，趕入馬場，見到第一場隻「卡加小子」成為大熱門，賠率愈嚟愈熱，曾志偉阿叻尹志強等大堆人馬壓陣，尹志強又話卜咗一個廂房與幾十名親友預備慶賀曾志偉呢位掌門人拉頭馬，於是以「卡加小子」做膽，拖多幾隻。唉吔，落筆打三更，中晒腳，隻「卡加小子」跑第……相信掌門人等老友輸到暈晒，賽後報告話隻「卡加小子」心律不正常，左丁山條氣亦好唔正常。