著名編劇岸西寫咗咁多年劇本，電影《甜蜜蜜》、《男人四十》同《三岔口》都係出自佢嘅手筆，02年仲憑《男人四十》奪得金像獎最佳編劇。最近杜琪峯就搵佢做導演，開拍文藝片《蝴蝶飛》（暫名）。
《蝴》片係由有線旗下嘅驕陽電影投資，銀河映像製作，阿杜會擔任監製，男主角定咗係周渝民（仔仔），女主角就會喺林嘉欣、周迅、高圓圓、李冰冰、張靜初同黃奕之中揀一個，不過馮仁昭聽聞女主角酬勞偏低，加上又唔係阿杜做導演，所以搵人有一定難度。
送內地審批
岸西導演呢部文藝片原定上月開鏡，但因為岸西要求較高，覺得個劇本未夠好，決定再寫好啲先開鏡，結果要推遲到八、九月先開拍。古仔係講一對戀愛中嘅男女一次因小事嗌交，個男仔意外死咗，女方一直未能忘情，終於有日畀佢見番男友個靈魂……。因為部戲會喺內地上映，𠵱家個劇本已經攞咗去國家電影局送檢喇。
