最近我阿利睇報紙，見到話今年選民登記有所增長，而且會計界仲有唔細嘅升幅㖭，選民多咗三千幾，突破二萬人咁厲害。
見到咁嘅數字，我阿利都睇到嘩嘩聲。查實陀地公會都只不過有二萬五千會員，有二萬人登記咗。即係話每五個人就有四個係選民，公民意識之高，咁多年以嚟實屬少見。
見到多咗三千幾人登記，我阿利就喺度諗，究竟乜嘢原因令到有成三千幾人走去登記？首先，今次啲選民登記咗之後，只不過去選選委，而選委都唔係咁多人知道係乜料，斷估唔會係啲人自動仆到去登記就係為咗呢樣嘢。
忽然有公民意識
第二，今次都冇學似上次選民登記咁，個個都大鑼大鼓猛捉人去登記，有嘅只不過係逐小逐小一忽忽嘅小撮人叫人去登記。論鋪天蓋地，一定冇上次咁墟冚。第三，會計界唔似得其他界別，有明顯嘅政治取態。冇一個人可以用政治動員能力去迫人登記咁把炮。
綜合以上嘅觀察，唯一解釋係嗰三千幾人公民意識特別強烈，知道自己未登記後，嗱嗱聲攞表去填，若果係咁嘅話，咁年底嘅會計界選委就有嘢睇，呢三千幾個咁有公民意識嘅新人，足以左右大局。換言之，會計界嗰廿票會點樣歸邊，𠵱家仲講唔清。