英格蘭最後1場分組賽對瑞典，呢個戲碼除咗喺東道主德國亮相之外，應該就係全城最矚目嘅球賽。而香港又有咁多英格蘭躉，重視程度就更加勁過德國。英格蘭有38年未曾在瑞典身上取勝，所以有線直擊隊今次就選擇直擊這場大戰。
我們一行人星期一抵達科隆球場，先睇睇英格蘭同瑞典嘅最後操練。打頭陣嘅英軍只開放咗15分鐘畀傳媒拍攝同影相，之後就閉門練習。一班英格蘭傳媒亦都好守規矩，採訪完就即刻到新聞中心，等部份球員同領隊到場先接受訪問。
全市被英軍支持者佔據
大約1個鐘頭後，英軍操練終於結束，艾歷臣嘅官方訪問亦做完。睇吓時間，應該係到英格蘭嘅對手瑞典到場操練。正當準備起行拍攝球場之際，就見到其他英格蘭傳媒無人動身；心諗，點解唔去了解吓對手呢，唔通呢啲就係英國人做嘢嘅原則？其實瑞典之前嘅操練曾經發生過打架事件，涉案嘅兩名球員龍格保及美爾保同樣都喺英國搵食，照理都應該有採訪嘅話題。不過，呢課操練就比想像之中簡單，睇來睇去都係得熱身、控球動作，早前嘅埋牙打架鏡頭就當然係冇得睇啦！
每逢有英格蘭大軍出沒嘅地方，就一定見到佢哋嘅支持者，喺科隆亦唔例外。呢班球迷帶埋國旗，擺明係英格蘭躉喺附近駐紮咁。到咗比賽，除咗球場範圍，相信成個科隆巿都會畀佢哋佔據：酒店、餐廳及露天大電視廣場，總之有波睇嘅地方都會發現英格蘭球迷蹤影。
有線06世界盃嘉年華，將於今晚8:00pm——10:00pm，播出世盃外景隊採訪滙報
