港股急彈兩日後，又連續調整兩日，噚日恒指最多曾跌超過200點，收市15608，跌159點。大市調整，恒指補回部份上升裂口，只要能守穩在10日線（15565）之上，大市仍有機會再向高位進發，目標係16000至16200。
宏調有壓力，中資股亦跌到暈暈哋，H指又大跌151點，跌幅2.4%，諗住5.90元至6元，低買鞍鋼（347），結果5.80元都買到，最低重落到5.70元，好彩收市上番5.95元；呢個水平上車，揸中線，應該會有斬獲。
前日推介中遠國際（517），噚日在大跌市中逆流而上，收1.72元，升2仙，380多萬股成交，係有有心人在暗地收集。中遠國際在今次跌市中表現強勢，確認升破下降軌後，短線上升目標係2元，若再有注資消息，可繼續看好。
高風險博高回報
今日講一隻高風險股（當然有機會有高回報），就係最近宣布進軍採油業務的建星環保紙品（8011）。未講古之前，先睇股價走勢，今年2月中，建星曾高見0.465元，其後幾個月形成一個扁平的大圓底，現時股價重上高位（噚日最高0.495元，低價0.45元，收0.47元），在呢個水平會出現整固，消化完成後，若再破位而上，照度上去，短期目標係指向0.645元。
話明係高風險股，要玩亦只宜細細注，現水平入市，有機會博賺40%，但若果市勢唔就，就一定要嚴守跌10%就止蝕。至於中線，就要睇日後公司業務的發展，成就可大可小，股價有可能翻幾番，又或者開番倒車。
建星轉型，無疑係有得憧憬，今次收購汶萊西部的一塊油田（佔地逾3000平方公里）8.4%的權益，代價係2.25億元，以8億股新股作價0.282元支付，建星同時有權在3年內增持油田權益，最終可達到42%。
根據技術報告，油田可能有5.6億桶嘅石油蘊藏量，按市價計，估值可能達390億美元，若然成功勘探到石油及氣體並能投入商業生產，盈利當然係好可觀。不過，中石化（386）的母公司中國石化集團已應允就勘探及開採提供技術建設及支援，建星泊住大碼頭，有信心得多，唔排除以後同中石化集團有更多合作。
郭兆誠