出名Sell高檔次嘅薄扶林貝沙灣，第三期個住客會所，布局同外國博物館冇乜分別，掛名畫擺珍藏品，夠晒藝術氣息。既然花咗唔少心機同銀紙營造富貴環境，盈大自然會充份利用唔好嘥。
上個禮拜五，盈大就喺朗峰會所裏面搞咗個亞洲藝術獎名畫慈善拍賣會兼晚宴，成為首個舉行慈善拍賣嘅住客會所。到場嘉賓有成150位，包括蘇富比拍賣行、金融時報同埋國泰航空等名人，參觀貝沙灣會所自然係指定節目，即場重搞咗個蘇富比慈善拍賣，競投30幅作品，雖然籌得約120萬善款唔算多，但收益會撥作亞洲藝術發展用途，都算有意義。
聽講，盈大當晚都投咗幅以Evolving為題嘅名畫，放喺會所裏面，貝沙灣住戶仲可以用買樓時嘅積分，租借幅畫返屋企欣賞。