唔好以為茶餐廳嘅餸菜一定多油多鹽，位於牛頭角屋邨呢間茶餐廳就特別推出健康菜式，唔少老人家同小朋友都話鍾意去呢度食飯多過留喺屋企。今次搵嚟大廚棠哥公開佢餐牌上嘅獨門菜式，發覺一啲都唔複雜，而且可以喺屋企好快整到，各位靚太，今晚係時候出招喇！
記者：曾靜茵
攝影：周旭文
示範：蘭香園棠哥
地址：牛頭角牛頭角道273-275號地下
電話：23896443
紅梅白雪 蛋白要快炒
$18/4人
需時：15分鐘
番茄價：$5/斤
西蘭花價：$10/2個
小朋友最愛吃番茄炒蛋，酸酸甜甜送飯一流，而老闆亦特意選用蛋白，減少菜式中所含的膽固醇，另外還加入西蘭花，夠晒色彩，唔怕小朋友揀飲擇食。
材料
蛋白4隻、鮮奶半支、番茄8安士、茄汁2湯匙、茄膏1湯匙、糖1湯匙、鹽半茶匙、生粉1茶匙、西蘭花8安士、果仁2安士
簡易法
1.燒熱鑊，加入8安士油，加蛋白及鮮奶炒至凝固；
2.番茄先飛水，加入茄汁、茄膏、糖、鹽及少許水炒熟後，以生粉埋芡；
3.西蘭花灼2分鐘後撒上果仁伴碟即成。
貼士：
炒蛋的油溫要7成熟，剛起煙即可，而炒蛋白時可以中火快炒，要不停地炒先會嫩滑。
紅酒燴牛尾煲 幼滑勁香
$30/4人
需時：15分鐘（未計燜煮時間）
牛尾價：$28/斤
木瓜價：$6/磅
牛尾加入木瓜一齊煮，後者內含的酵素能令牛尾於短時間內煮腍，而且非常幼滑，再加入紅酒調味，香味勁飆。
材料
牛尾2磅、牛油1安士、番茄膏3湯匙、香葉1片、紅酒300毫升、木瓜8安士、甘笋半個、鹽1茶匙、糖3湯匙
簡易法
1.牛尾飛水；
2.以牛油起鑊，加入茄膏、牛尾及香葉，炒至金黃色；
3.加入紅酒及其他材料，放入煲內燜2小時即可。
貼士：
牛尾與牛油要炒至金黃色加入紅酒，吃時才夠香，若家中有真空煲，可放於煲內燜煮。
金塘豆腐 無豆腐都掂
$25/4人
需時：25分鐘
南瓜價：$4/斤
帶子價：$110/磅
金塘豆腐實際上沒有豆腐的材料，當中以南瓜、蛋白攪勻後蒸熟，猶如金色的豆腐，之後再於面層淋上海鮮，增加口感，老少咸宜。
材料
南瓜8安士、蛋白4隻、蝦乾數條、鮮帶子、鮮蝦仁各4隻、鮮菇片2隻、菜粒、甘笋粒各1湯匙、鹽半茶匙、胡椒粉少許
簡易法
1.南瓜先蒸熟再壓成茸，加入蛋白攪勻；
2.碟底鋪上蝦乾，倒入步驟1的材料蒸8分鐘；
3.將其他材料飛水後略炒，調味後以生粉埋芡，再淋上蛋面即成。
貼士：
要有豆腐一樣咁滑嘅效果，視乎蛋白拂得勻唔勻同落蛋嘅時間，記得要水滾後才落蛋，然後再轉中火來蒸。
南瓜海帶豬踭湯 降血壓兼利尿
$35/4人
需時：2小時
豬踭價：$24/斤
海帶價：$16/斤
香港人最愛老火湯，老闆就得到中醫師傳授秘技，炮製出這款南瓜海帶湯，除咗入口鮮甜美味外，海帶仲有助降血壓、利尿等功效。
材料
豬踭1斤、海帶2両、南瓜1個、蜜棗3粒、鹽少許
簡易法
1.豬踭飛水、海帶以滾水浸腍、南瓜洗淨切件；
2.將所有材料放入煲中煲2小時，以鹽調味後即成。
貼士：
想更入味，煲完後熄火焗半小時；南瓜不要切得太薄太細，以免全溶於湯內無晒口感。
註：以上價錢以6月20日九龍城市政大廈街市為準