德國嘅交通管制做得好完善。好多世界盃重要賽事、大型節目都喺首都柏林舉行。加上佢呢度係德國嘅交通樞紐，所以呢度嘅政府出咗好多方法去鼓勵市民多用公共交通，目的就係想控制好私家車嘅流量，令空氣清新啲、環保啲。
其中一樣最有特色嘅就係「單車轉乘」服務。喺德國火車站入面，只要你落咗火車，就可以喺站入面租借單車自己踩返屋企，收費都好平。好多市民都好樂意搭完火車就踩單車返屋企；既慳錢，又可以響應環保呢！記得細細個喺呢度讀書嗰陣，政府都會派啲免費巴士券同電車券咁，好多學生都同我一樣會搭巴士電車返學㗎！
今年德國警方增派3萬2千人，取消佢哋休假，就係想控制好交通同治安。今年重遊柏林，感覺比起以前東西柏林嘅時代安全，少咗好多複雜嘅人，就係因為多咗啲警察站崗，我喺度都過得好安心。
袁彩雲
無綫世界盃直擊主持