煲呔日日夜夜話要搞強政勵治，但係就唔夠人手，特別係被喻為天之驕子嘅AO，大大話話差成四、五十人，真係十個茶壺九個蓋，點都唔夠冚。
不過，唔夠還唔夠，好多政務主任都毫不留戀咁離開，你話奇唔奇怪。八方聽聞，舊年因私人原因（屋企因樓上裝修被破壞所以攞大假整番掂個竇）同馬時亨說再見嘅盧古嘉利最近向政府遞咗辭職信，實行劈炮唔撈。
問公務員事務局盧太係唔係提早退休，佢哋話唔係。Clarie今年未夠50，正係打得之時，佢做禁毒專員嘅形象最深入民間，早前八方撞到佢去馬會飲茶，盧太仲話等緊局方安排新任務，究竟點解忽然唔做，真係耐人尋味。話晒佢係煲呔當年親自去中大招聘嘅，後來就跟咗葉劉，莫非佢等葉劉回朝，一齊組黨。
另一個好奇怪嘅就係肥龍契女、靚太黎高穎怡，佢阿姐話咗7月走，最後又留，不過只做多一個月，幫手做明年十周年回歸慶祝活動嘅前期籌備工作，認真騎呢，唔通成個政府都冇人可以做前期統籌，一定要黎太，係咁重要就唔好畀佢走啦。
特區政府留唔到啲靚太太，連年輕有為嘅方志偉都一樣要走，如冇意外，佢會喺8月接手做總商會嘅總裁，坐咗翁以登個位。咁多人有大好前途嘅高官都唔做，煲呔真係要諗吓點解囉。
爆料熱線：29290000、27860099
報料傳真：26239278
報料電郵：[email protected]