麥當勞近年發展內地市場，一直俾對手肯德基家鄉雞㩒住嚟打，舊年又換高層又度計仔，最近終於畀佢諗到條絕世好橋，就係拍住內地石化巨擘中石化，利用中石化全國3萬個加油站網絡，發展「得來速（Drive-Thru）」汽車餐廳，希望力挽狂瀾。
呢單係雙贏合作，麥當勞可以攞番多啲市場佔有率，中石化嘅形象亦可以「潮」啲，一家便宜兩家着。要打中國呢個龐大「孖屐」，最快辦法都係同國企結盟，好似英資背景嘅國泰航空都同中國國航搞互控，麥當勞拍中石化完全合理。
兩間公司噚日響北京簽約，麥當勞（中國）首席執行官施樂生話，內地愈來愈多人買車揸車，利用中石化油站發展快餐業，大有作為。佢哋初步諗住以北京、上海同廣州等大城市作試點，之後再發大嚟搞。