侍仔：今晚C、D組又有最後一場賽事進行，唔知招積域敢唔敢睇塞黑對科特迪瓦嗰場呢？
菠蘿文：上次畀阿根廷狂數，見到佢哋班人無晒表情，都唔忍心即場揶揄佢哋啦。呢場雖然塞黑「客勝」熱到1.7倍，但高洛文同基士文停賽，加上其他球員自第1場開始就無心戀戰，就算受讓2球都唔值得下注。
招積域：唉！我真係一邊睇一邊鬧，科特迪瓦同阿根廷、荷蘭都係同一路波，塞黑死梗，成為第一支外圍賽小組冠軍嘅決賽周「3零部隊」，你哋買定科特迪瓦「主勝」同2:0波膽啦。
侍仔：算啦，下屆換個國名咪再踢多次囉，咁荷蘭嗰場點樣呀？
招積域：兩隊都夠分出線，加上各自有球員因黃牌而避戰，所以都係副選對陣嘅比賽。荷蘭有6個球員有黃牌喺身，但可能有得睇古積特打右翼，好期待佢嘅演出，唔知佢會唔會拍住雲佬呢？就咁睇阿根廷贏面似乎大啲，2倍嘅單W同上盤都可以一試。
菠蘿文：伊朗對安哥拉又如何呢？
侍仔：馬會開平手盤，但安哥拉數字上仍有出線機會，只要葡萄牙贏墨西哥，而安哥拉又淨贏伊朗3球或以上就可以出線16強，所以預計會係一場好刺激嘅賽事。
招積域：葡萄牙和波都得啦，做咩事要幫安哥拉打江山？唔係宗主國要幫前殖民地吓話？同埋伊朗班波高過安哥拉喎。
侍仔：足球同政治唔好拉埋一齊，伊朗係比想像中好，但我更信非洲球隊嘅拼搏精神，所以自己買咗安哥拉單W同波膽3:0、4:1。
招積域：既然1分夠數，做咩要博盡求一勝？和波大家Happy咪得囉，一於買葡萄牙0:0波膽同和波。
文：高洛文