分組賽去到最後階段，D組形勢除葡萄牙已穩奪出線權外，其餘墨西哥同安哥拉仍有力爭出線資格。今日推介葡萄牙對墨西哥呢場大戰。
葡萄牙分組賽2戰2勝，已肯定晉身16強，今場為避免球員受傷及累積黃牌，大有機會保留實力，收起有牌喺身嘅老將；加上睇過上場對伊朗，贏波都只係靠迪高嘅「世界波」，同「C朗」嘅十二碼，表現唔算特別好，今場對住同組最強嘅對手墨西哥，要贏都並唔係咁易。
相反墨西哥只要攞多1分，就唔使理會另一邊伊朗對安哥拉賽果，可以再入16強，今場就算贏唔到都要摸和對手，鬥志鮮明；響咁嘅情況下，我寧願信有戰意嘅墨西哥。
阿根廷着晒火可再捷
另一場心水，選咗荷蘭對阿根廷，荷蘭上場幾經辛苦下，先至能夠險勝科特迪瓦2:1，殺入16強，今場對住同組實力最強嘅阿根廷，要贏絕對有困難。
事關阿根廷響兩場分組賽已經着晒火，贏完科特迪瓦之後，上場更加怒炒塞黑6:0，兩場波合共入咗8球，係現時32支球隊當中入球最多嘅一隊。
今場只要保持狀態同比賽態度，就算收起部份正選同有牌在身嘅球員，絕對有力取得3連勝，一於半個博一個，捧阿根廷。
陳樹鵬（阿鵬）
有線球彩台主持
電郵：[email protected]