1.減價貨有得試
好多人都以為減價貨品冇得試，錯！原來唔少大舖喺減價期間都會提供試身服務。建議你最好一次過揀定幾件入FittingRoom，否則輪試身室都輪到腳軟。
2.改褲腳要畀錢
一般大牌子都設有免費改衫改褲服務，但一到減價期就一律額外收費。而且價錢一啲都唔平，改褲腳約每條$60左右，雖然貴過街外，不過畀佢哋改就包有番原裝褲腳。
3.減價有得換
掃開減價貨嘅醒目女都知減價貨品一律不設退換，所以畀錢時記住Check清楚，尤其係一啲線口位。不過出名顧客服務第一嘅英國公司就連減價貨都有得換，例如馬莎百貨，但就要記住Keep單。
4.補番部件唔收錢
減價期間畀錢時要Check件衫係咪冇穿冇爛之外，好多時衫褲都有後備鈕釘喺衫嘅招牌度，雖然暫時冇用，但真係有用起來冇咗都幾麻煩。不過根據各大店員提供資料，如果顧客要求取回後備鈕扣的話，佢哋都會盡量向總公司或廠方要求補給，仲話唔收錢㖭，詳情就要向各舖店員查詢。
5.斷碼各不同
減價貨要鬥快買就係人都知，因為好多都已經係斷碼貨。好多人都以為斷親都係中碼，但其實斷咩碼要視乎咩牌子嘅衫，若果係日本貨就通常斷大中碼，歐洲美國貨就斷細碼多。
6.要揀襟興款
女人心態係見減價就乜都買，店主Sandy畀定貼士各位：最好買啲襟興啲嘅款，否則季尾時間仲着住淨係今年興嘅款，着嘅時間咁短就算減咗價都唔抵啦！
