懷孕四個多月的袁詠儀（靚靚）雖然粗身大勢，但仍然不時外出，日前她偕丈夫張智霖（Chilam）夜遊，拍拖到灣仔歎日本菜。現場見靚靚的腹部明顯隆起，向來是微波族的她更因谷奶而上圍連升幾cup，Chilam則全程昅實，為妻子小心開路。
袁詠儀屆35歲高齡才首次懷孕，丈夫張智霖難免緊張，昅實老婆一舉一動，事無大小均妥善照顧。上周三晚，向來喜歡與朋友大堆頭開飯的Chilam和靚靚，也鮮見地撇低飯腳如郭富城和沈嘉偉，拍拖到灣仔大亞味工房日本料理，歎日本菜撐枱腳。
臉部略浮腫
當晚9時多，靚靚和Chilam在店內開餐後雙雙離場，當時一身牛記笠記的Chilam一馬當先，眼睩睩四處視察環境，小心翼翼為妻開路，身穿寬身T恤及闊褲的靚靚拿着一袋外賣尾隨，與夫漫步到附近停車場取車。
現場見素顏靚靚明顯比前增磅，手腳及臉部略帶孕婦常見的浮腫，雖然是四個多月身孕，但腹部顯著隆起，昔日屬於平胸族的她也谷奶大升cup，尤其上車後綁上安全帶時，更凸顯其至少升了兩cup的豐胸。
視線不離妻
Chilam拖靚靚由食肆步往停車場，兩公婆雖然沒有親熱動作，但Chilam視線不離對方，全程距離靚靚不足五步範圍，行兩步便停下，等候步履較慢的靚靚上前。其後兩人取回黑色波子Jeep座駕駛離停車場時，發現現場有記者，Chilam即搖搖頭、揮揮手，示意不接受訪問，但他們一直面帶微笑，慢慢開車直駛離場。
採訪、攝影：娛樂突發組
