近年各大商場競爭白熱化，一到大時大節，各商場宣傳推廣部都要扭盡六壬度橋，務求將個場搞到熱熱鬧鬧，淨係睇吓世界盃期間，各個商場奇招百出就知。梗係喇，收咗租戶宣傳費，唔搞旺個場，點同班租客交代？第日想加租都無藉口。
不過，華置租務經理王孚威就話，佢哋一直都無收租戶宣傳推廣費，皆因呢條數已經包咗喺管理費裏面，唔夠就由集團補貼。咁着數？會唔會收多啲管理費補番，實行「羊毛出在羊身上」呢？王孚威話佢哋商場管理費，每呎由6蚊到12蚊左右。蘭西格過價，又真係同其他商場差唔多，無出茅招喎。
講到同租戶分成嘅問題，王孚威就話旗下部份商場，𠵱家只係同大租戶或者食肆先至會計分成；但睇番個大趨勢，遲吓都會考慮連細舖都咁做。
華置近兩年積極翻新商場，一間大舖分拆成幾十間細舖，租值大升唔在講，如果遲啲同埋細舖做分成，條數都幾和味。呢邊廂唔收宣傳費幫租戶搞旺個場，好似好蝕底；但另一邊廂大舖變細舖，籌備做分成，諗落肯定賺得仲多，果然識計數。
電郵地址：[email protected]