香港商場無論規劃、宣傳、推廣、配套，都係內地嘅主要參考對象，除咗因為內地企業多數會嚟香港取經之外；好多返入內地搞商場嘅香港發展商，自然會將香港嘅成功模式，照辦煮碗咁喺內地大搞，唔理個概念嚟自邊，啱用就照搬。
長實同和黃搞嘅廣州旗艦商場西城都薈，利用坐落廣州地鐵黃沙站上蓋地利，先照搬一個「零」距離概念，分別在於佢嘅距離係真正接近零，而唔係行成條馬路先至到嗰啲。
究竟點樣零距離法呢？西城都薈嘅負一層（即地庫1樓）同黃沙站大堂直接相連，一出站就係商場範圍。
另一樣擺明照搬嘅必殺技，就係外牆大電視，西城都薈面向上下九商業步行街嘅北廣場，會裝個10米乘7米（33呎乘23呎）嘅巨型電視，全天候播放國家以至全世界各項盛事，既吸引人流，嚟張萬人歡呼大場面照片，又可以成日見報嘞。