iPod大賣，相關周邊如雨後春笋般湧現，最普遍係iPod喇叭到汽車叉電器，到家陣一大堆同類產品，其實新意已經極度欠奉。日本家庭電器牌子Twinbird，就好有創意咁推出1款防水iPod喇叭XZABADY，用家只須將喇叭內嘅35mm插頭，直駁落iPod耳筒位就可聽歌，方便大家兼容咁多代嘅iPod。
成部iPod可安全收納喺盒內，加上背後吸盤，方便穩妥吸住磚牆，真係沖涼、洗碗時歎靚歌都得。官方話XZABADY達日本JIS第7級保護（有效防水深約1米），就算聽歌時High得滯，唔覺意撥咗佢落水，拎番上嚟一樣冇事！
其他特色係已內置FM收音功能，唔聽歌都可收聽吓電台節目同新聞，不過數到最正係外觀玩花臣，除咗黑、白兩色外殼畀你襯番部iPod外，最正係可為XZABADY內櫳換入唔同嘅背景紙，DIY番個獨一無二嘅靚風景襯番部iPod，就算當係禮物送畀朋友，都會覺得你好有心思！
記者：徐影龍
相關網址：www.twinbird.jp/