昨日好彩有單電訊盈科（008）可能出售電訊業務資產消息頂住，大市先至冇咁悶。
電盈打算將大部份生意賣俾外資，阿爺究竟制唔制，認真係耐人尋味，但姑勿論單交易成唔成都好，總之昨日電盈股價就炒咗上去，大升8.33％，收5.20元。
另外，經紀黃早排品題過的利信達集團（738），昨日公布全年業績，盈利升32％，有9015.6萬元，以及派末期息4.5仙，其實算唔錯。
雖然本地鞋舖零售受到貴租影響盈利下跌，但大陸方面就如早前所講發展迅速，家陣利信達喺大陸的銷售點，連同自己專櫃同埋特許經營等，加埋超過250個，公司亦繼續開舖。另外，順德新生產線又快開始投產，出口數量有望提升。
利信達股價昨日升4.85％，收1.08元，成交股數81.2萬股，金額87.94萬元。利信達業績靚，但成交稀疏，唔夠鑊氣，始終係一個問題。
慕容小初