楊貴妃鍾意食荔枝，唐玄宗不惜千里快馬送到佢嘴邊，可見清甜荔香的確令人瘋狂。都係做現代人好，食荔枝唔使勞師動眾，打個電話搭程車就有得食，有食肆趁荔枝當造推出一系列荔枝菜式，用嘅仲要係有機桂味，加上唔用味精，包你食得涼爽又健康。
記者：李潔盈
攝影：黃子偉
模特兒：Winnie（Salvador）
雙層果凍$60/6件
荔枝茸溝魚膠粉做果凍底層，凝固到七八成時鋪上貝殼形荔枝肉，再封多層魚膠上面，賣相晶瑩通透，啖啖荔枝原始果香，真正無添加。
從未試過訪問食客如此順利，梁師傅搬一碟碟荔枝菜出嚟嗰陣，店內食客已經眼望望，影完相，我一句：「唔好客氣，大家隨便試食。」食客即時流口水兼起哄，企起身喪搶。有相為證，當中以雙層果凍最多人搶，食客一搶到就大啖放入口，完全唔顧儀態，仲七嘴八舌猛話好味。
焗南瓜蝦仁$98
荔枝放入原隻南瓜盅，加蝦仁、煙肉，用紅酒汁、瑞士雜香草調味，清爽荔枝加香甜南瓜感覺清新，蝦仁同煙肉粒口感爽滑。
焗番茄有機荔枝$88/8件
一個個番茄杯外形甚Cute，梁師傅話：「番茄雖然比較酸，但唔會冚過荔枝味，反而能夠突出有機荔枝嘅清爽微酸。」上面再加煙肉粒、香草，更有咬口。
羊仔串$98/12件
梁師傅：「揀羊肉貪佢肉質夠嫩，我用法式煮法，牛油起鑊加黑椒汁炒，味道較濃。」荔枝Juicy、黃椒爽口、羊肉嫩口，成串塞入口，一次過有三種口感。
山楂釀百花球$98
蝦膠釀入荔枝做餡，點生粉稍微炸一炸，以免落鑊炒散晒。芡汁用山楂同荔枝醋做成，酸酸甜甜夠晒醒胃，飯都扒多兩啖。
海鮮盞$98/6件
蝦仁、帶子清淡海鮮，配露笋、西芹、酸酸哋嘅日本蘿蔔，全部材料唔會掩蓋主角荔枝香味，放落春卷皮做成嘅碟仔上，爽口彈牙又夠脆。
有機荔枝特飲$20
荔枝汁溝紅菜頭汁變成紅色，加薄荷葉清涼到痹，再溝埋荔枝蜂蜜夠晒滋潤消暑。此乃唯一推廣期後仍會在餐牌出現嘅特飲，無當造荔枝會改用椰果代替。
啖啖師傅心思
「新生餐廳」係「新生精神復康會」屬下機構，為推廣有機食品同籌募經費，由即日起至6月30日推出一系列有機荔枝菜，入行超過二十年嘅大廚梁師傅話：「加入呢間餐廳先開始接觸有機食材，𠵱家我唔用味精，連鹽同糖都少用，自從煮多咗有機菜，我自己都比以前更注重飲食健康。」今次推出嘅荔枝菜選有機桂味入饌，桂味味道較一般荔枝微酸，梁師傅花咗個幾月時間度菜式：「都幾惡諗㗎，既要突出桂味清香，但又唔可以太濃荔枝味，每道菜都要保持清淡原則。」為令荔枝更爽口，每粒荔枝去皮起核後，會先浸冰水保持質感，又因有機桂味水份含量較多，煮前要先拖水，否則荔枝上碟會出水影響味道，某啲菜式仲要將餡料逐粒釀入荔枝肉，每一啖都保證食到師傅心思。
買有機桂味返屋企
廣東、廣西、福建係荔枝主要產地，有妃子笑、糯米糍等多個品種。今次荔枝菜用嘅有機桂味由深圳引入，同糯米糍同屬上品，帶桂花香，皮薄肉厚兼清甜，並且經過香港「有機認證中心」認證，攞晒號碼標籤證明無化學成份，非常健康。想直接買番啲返屋企慢慢歎？打個電話去「新生精神復康會」屬下嘅「新生農社」訂購喇（電話：26989555，價錢：每1,000克約$50）。
一粒荔枝三把火？
據《本草綱目》記載，荔枝「生津、通神、益腎、健氣，益人顏色」，即有生津止血、理氣止痛功效，註冊中醫師吳振武話：「荔枝性溫，燥熱與否因人而異，不過陰虛火旺、皮膚容易生暗瘡、胃熱口苦嘅人就唔好食咁多荔枝，以免上火。如果唔想咁燥熱，可以飲酸梅湯、蜂蜜、菊花茶或白果腐竹糖水降火。」
搵食攻略
新生餐廳（27774726）
地址：深水埗南昌街290號石硤尾公園體育館地下
營業時間：10:00am-9:00pm（餐廳只做午市，5:00pm-9:00pm只供應小食）
交通：石硤尾地鐵站A出口，轉乘30B小巴直達
座位：60個，星期一至五午市最多學生食客，星期六、日人客較少，有露天位，個View唔錯
人均消費：$20-$30
最好賣：各式炭爐燒味，呢期最好賣一定係荔枝菜
備註：供應期至6月30日，荔枝菜如要堂食，須一日前致電預訂，另有外賣及到會服務，價格數量略有不同
