好多深謀遠慮嘅教練，都好識得避免「樹大招風」，分組賽3戰全勝，係就係好威，不過肯定成為列強假想敵，甚至惹來「烏鴉口」比利青睞㖭。以比格文同史高拉利嘅經驗，最後一仗梗係留力，阿根廷同葡萄牙真係捧唔過。
比格文早有心留力
阿根廷上仗半場已然領先塞黑3粒，其實下半場初段，比格文已經有留手feel，俾晒塞黑攻；不過，塞黑真係唔爭氣，加上一對小將美斯同泰維斯勒唔住，先湊成6:0大勝，比格文賽後隨時埋怨兩個生牯仔唔識留力。
睇番C組形勢，阿根廷得失球已經拋離荷蘭，今場和波已經取得首名，另外基斯普、沙維奧拿、軒斯等主力已經有黃牌在身，比格文已經講明今場要收起佢哋，阿根廷實力打折扣，戰意又平平，荷蘭受讓平/半，下盤同和波都可以兼投。
葡墨和波高唱入雲
葡萄牙由史高拉利執教後，一改以往華而不實作風，雖然2場贏波都唔算好清脆，但都叫做攞足6分肯定出線，今仗攞1分就肯定首名出線，為避開好大機會取得C組首名嘅阿根廷，以「大菲」老江湖，相信佢都唔想咁快撼阿根廷。墨西哥又係一支只求出線，不求觀賞性嘅球隊，記得上屆分組賽最後1仗意大利對墨西哥，只要雙方各取1分就齊齊出線，結果真係打成1:1，今仗足智彩開到和波只得2.6倍，開出機會高唱入雲。
同日推介另一場入球大，就係博科特迪瓦同塞黑兩支出局球隊，最後一仗合演好戲，科軍演出大獲好評，2場都有波入，塞黑今仗亦希望入波開齋，2倍大好值博。
文：牽牛