成日話豪宅租盤供應唔夠，呎租五、六十蚊都大把人爭，不過，山頂貴重洋房──電盈李澤楷都租住過嘅柯士甸山道8號，啱啱錄得一宗比市價低近兩成嘅租務成交。屋之島歐志康透露，C號洋房，5206呎，有私家𨋢同泳池，每月淨租金20萬。銀碼雖大，但計落呎租只係38.4蚊，比起早前薄扶林貝沙灣3期一個單位，以呎租39蚊租出，就知呢個山頂洋房租得有幾平。
柯士甸山道8號係南豐嘅收租盤，喺03年沙士期間推出，其中最靚嘅A屋，月租43萬，呎租67蚊；即使只有3790呎嘅G屋，喺沙士後租出，月租都要16萬，每呎42.2蚊，估唔到𠵱家租金仲平。
山頂南區今個月已經有10宗月租過12萬嘅大額租務成交，比平時多1倍，其中呎租最高嘅壽山村道12號，3746呎，租咗18萬，每呎48.1蚊。