美聯儲局主席伯南克上周尾段做「救火員」，改口話通脹受控，環球股市乘勢急彈兩日，但可惜其他聯儲局官員則繼續「放火」，搞到美股本周又再回軟，杜指周一晚跌72點，萬一點再度失守，收10942。
港股昨跟隨外圍下跌，恒指跌159點，收15608。恒指10日線現處15565，假如再跌穿，相信會下試早前低位15204，可以伺機炒一轉恒指P輪3548。恒指P輪3548昨升12%，收0.167元，但宜炒超短線，見好就收，除非恒指確認跌破15204。
大市昨日再回復跌勢，但亦有跌市奇葩，而且令到唔少散戶神經緊張，即刻沽貨走人。究竟係邊隻咁勁？小小超的電盈（008）是也。
電盈近年成為港股新一代「藍燈籠」，每逢輪到電盈升，大市通常已見頂。早前1次是5月11日，電盈當日高見5.45元，收5.35元，升2.9%。兩日之後，恒指確認展開調整，大跌逾400點，而且一路跌至上周二的低位15204才初步喘定，但急彈兩日後又再回落，咁啱大市這兩日掉頭再跌，又正是電盈升得最急之時。
電盈昨日受洽售大部份電訊服務及媒體相關資產消息刺激，股價大升8.3%，收5.20元，若由上周二低位4.525元計，反彈幅度達15%。如果兩三日之後，恒指真係跌穿近期低位15204再向下尋底，電盈呢隻「藍燈籠」將更深入民心，好難洗底。
小小超又玩財技
趙飛雲近年列電盈為唔使睇嘅股票，除咗因為早年受創太深，唔想眼寃之外，亦因為小小超只專注玩財技，如今稍為執靚電盈，即刻想善價而沽，不過呢單交易唔易傾得掂，單係要過政府嗰關相信已經有排搞，不過無論成事與否，起碼對電盈股價有短期刺激。
趙飛雲