烏克蘭周一大勝沙地阿拉伯4粒，賽後國際足協技術小組成員之一、前秘魯名宿喬貝拉斯大讚烏軍今屆大把前途喎！
一代秘魯名宿喬貝拉斯話，烏克蘭有出色嘅守衞，有優秀嘅防中，加上前面有舒夫真高助陣，配搭極之出色，總之係讚到「天上有地下無」啦！國際足協個技術小組好少咁高調唱好一隊波，世界盃第3輪都開始，但佢哋連巴西、阿根廷同荷蘭等勁旅都冇讚過，反而讚烏克蘭叻仔，今屆仲可以去到好遠㖭（但冇講明去到乜位置）！真係有啲令人意外。
烏克蘭第1仗俾西班牙大炒，太早失球可能係原因之一，但係第2場波大勝沙地，理由好可能係對手太弱，而且落緊大雨對歐洲隊十分有利，因此球隊係咪真係咁勁揪，世盃判官認為見仁見智。烏克蘭要出線問題唔大，皆因下仗打和突尼西亞，已經好大機會晉級，但16強面對唔係易啃嘅法國、瑞士或者南韓，各位賭仔千祈唔好咁易就信晒啲專家意見，唔係輸咗唔好賴我判官冇提醒你喇！
判官話
烏克蘭係咪咁勁就未知，但舒夫真高就真係冇得頂，買佢「首球」總好過貼烏克蘭入8強啦！
前途指數：★★★
註：以5★為最高
專家話：沙地太弱不足為據
「沙地是今屆決賽周3弱之一，實力比起於90年代的沙地亦不如，防守上經常犯上很多不能接受的失誤，故烏克蘭大勝沙地，亦不代表烏克蘭足以挑戰列強。」
丘建威(有線足球評述員)
網民反應：烏克蘭飄忽冇特別
網民又對首次晉身世界盃決賽周的烏克蘭有何睇法呢？「佢哋表現好飄忽，難估。」「嘩！咁樣出口術都得？」「睇咗第1場就唔係好覺得佢哋有乜特別。」
世盃判官歡迎球迷來稿
世盃判官係1個世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿啦！來稿勿過300字。
世盃判官體育版電郵：[email protected]
體育版傳真熱線：23703534