當睇過晒32支球隊嘅表現之後，我認為哥斯達黎加嘅表現係最差嘅1隊：前線球員攻力不足，後防經常錯漏百出，成班波嘅組織力真係相當之低。上場對住實力一般嘅厄瓜多爾都要淨輸3球，今場對住同樣宣布提早出局嘅波蘭，輸波睇嚟都係例行公事。
千里達最後一擊實搏
賽前波蘭被喻為A組嘅出線熱門之一，點知首場對住厄瓜多爾就輸波，第2場對住主辦國德國，諗住可以和波取得1分，可惜去到補時階段先畀紐維利射入奠定勝局嘅1球，真係臨尾香。
雖然波蘭2戰全敗已經無緣晉身16強，不過其實以佢哋嘅整體實力，對住哥斯達黎加贏波絕對唔係一件難事，呢場一於揀個1.7倍主客和嘅客勝。
另1場推介係B組賽事巴拉圭對千里達。巴拉圭2戰全敗，已經宣布提早出局，球員上下士氣同鬥志都一定大受打擊，既然今場反正都係例行公事，輸贏對球員都冇乜所謂，呢場又點會搏命呢？相反千里達其實想出線，仲有一線生機，今場只要大炒巴拉圭，而另一邊英格蘭贏咗瑞典嘅話，就可以憑得失球差壓住瑞典出線。
雖然機會係微咗少少，不過世事無絕對，而且成班球員嘅鬥志都肯定好過巴拉圭，不過為咗穩陣起見，都係揀個讓球主客和嘅「客勝」。
陳樹鵬（阿鵬）
有線球彩台主持
電郵：[email protected]