巴西喺安聯球場大戰澳洲，賽前一對前鋒被批評狀態差，但阿祖安奴嘅入波算係交到功課，一班遠道而來嘅捧場客總算冇失望而回。
「染黃」球場夠壯觀
但巴西貴為5屆世界盃冠軍，到場撐佢哋場嘅球迷，又點只來自南美洲呢？星期日有線直擊隊專程重返慕尼黑，就係見證呢支森巴兵團嘅魅力。可能係巴西同澳洲嘅主場戰衣都係黃色關係，將安聯球場搞到好似成個檸檬咁，場面不知幾壯觀。
訪問過好多巴西球迷，原來佢哋唔係清一色來自巴西，東道主德國、瑞士、波蘭同埋歐洲其他地方都有森巴球迷，當然亞洲地區嘅日本、南韓都有好多巴西迷到來朝聖；相反，澳洲球迷唔似巴西球迷咁國際化，佢哋絕大多數係當地人，但佢哋嘅聲勢都唔輸蝕㗎！
都係講番安聯球場先，個球場俾兩批巴西及澳洲球迷「染黃」，要分辨佢哋都有一定難度。經過我哋直擊隊嘅專業觀察，發現兩批球迷各有特色。就拎澳洲班球迷來講，佢哋最叻帶埋道具入場打氣，好似有吹氣袋鼠、吹氣恐龍等等，似足入場睇澳洲式欖球咁有嘉年華feel。
至於森巴球迷方面，佢哋嘅強項係跳舞，仲要係扭晒腰嗰隻，世界盃如果無咗佢哋，就好似有種缺憾咁囉。當然，搽到塊面又黃又綠嘅裝扮，亦都係巴西球迷強項。無法啦，4年先得1次，就算顏料危害皮膚都冇乜所謂啦！
直擊隊完成第2次到訪慕尼黑後，跟住我哋會飛去科隆，準備感受英格蘭對瑞典嘅大戰氣氛，大家記得留意！
有線06世界盃嘉年華，將於今晚8:00pm——10:00pm，播出世盃外景隊採訪滙報