為準備16強，荷蘭嘅尹巴士頓明示，第3仗中6個「黃牌球員」唔使上陣，咁啱洛賓係其中之一，即係「洛賓美斯大戰」可能暫時無緣亮相！
球隊現時都為出線16強準備，但有唔少球隊嘅國腳都備受黃牌所累，有教練就表示會喺第3仗收起「黃牌國腳」，以免佢哋再拎牌，要喺淘汰賽階段停賽；而荷蘭教練尹巴士頓就揚言，佢哋打阿根廷呢場「激戰」將收起6名球員，包括洛賓、雲邦美同希汀加等人；如果尹巴士頓唔係出口術，大家肯定無緣睇到「美斯激鬥洛賓」嘅經典一刻！
呢場「黃潮風暴」認真攞膽，事關除咗令到啲教練要畀「黃牌國腳」避戰，得以喺16強「洗底」外，亦令班友仔可以唞吓，唔使喺攝氏30幾度高溫下打足咁多場，養足精神打一場過「生死鬥」；但就間接削弱咗分組賽最後一輪嘅戲碼，容咩易遲啲巴西話收起羅賓奴、葡萄牙話收起基斯坦奴朗拿度、意大利話收起托迪㗎，到時連國際足協都會嘈埋一份！
判官話
收起「黃牌國腳」畀機會佢哋「洗底」係戰術之一，但唔好搞到我哋要睇啲副選行行企企就更好！
影響指數：★★★★
註：以5★為最高
專家話：「洗底」無可厚非
「由於國際足協表明嚴格執行某些條例，在較容易領黃牌下，球隊因應出線情況，在最後一場分組賽收起部份有黃牌在身的球員，實行『洗底』，在條例容許下是無可厚非。」
網民反應：「冇得睇洛賓鬥美斯」
外界又對呢場世盃黃潮風暴有咩反應呢？「畀我做教練都收起啦！」「我要睇洛賓鬥美斯呀！」「有諗頭嘅教練先識做嘅，用波歷克咪儍仔囉！」
世盃判官歡迎球迷來稿
世盃判官係1個世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿啦！來稿勿過300字。
世盃判官體育版電郵：[email protected]
體育版傳真熱線：23703534