德國人嘅環保意識都幾強，社區同學校教育都做得好好，市民識自動做好廢物分類。今次世界盃，德國人亦傳承咗呢種美德畀外國人睇，外國遊客嚟到德國，都加深咗佢哋嘅環保意識。
市內所見，呢度嘅垃圾桶分咗4種顏色同入口，分開紙同樽等廢料。即使你唔識德文都可以做好分類回收，因為上面都畫咗圖案，好容易分到。
自5月1日起，所有超級市場同賣飲品嘅地方，都有廢物回收計劃。顧客可以先將回收嘅樽放入檢查機器度檢查，部機就會自動列印一張單，如果啲樽無爛嘅話，就可以憑單claim錢。就連回收一個樽都咁自動化，你話佢哋幾先進！
其實，香港早前都有「無膠袋日」活動，我覺得我哋應該從呢個活動做起，一齊學德國人咁響應環保先得！
袁彩雲
無綫世界盃直擊主持