球場上，守門員係最孤單寂寞嘅。佢哋大部份時間，都淨係望住班隊友喺球場上跑來跑去，但係自己又乜都幫唔到手，唯一可以做嘅，就係好好把守身後嘅陣地。
就好似古時男人咁，上前線衝鋒陷陣殺敵，留低老婆一個獨守空闈。呢份寂寞真係不足為外人道。
不過，凡事都有例外，好似哥倫比亞狂人希基達同巴拉圭嘅捷拉華咁，佢哋就不甘寂寞，喺球場上想盡辦法突出自己。
雖然佢哋為球賽增添不少娛樂性，但係就難為班隊友囉！周不時要幫佢哋執漏，場邊嘅教練睇到咁，相信食幾包驚風散都唔掂。
總之，話之你把關技術有幾好，如果成日想玩嘢博出風頭嘅話，都係冇用嘅。我認為，安份守己係好龍門嘅先決條件，唔慌冇人吼咩？
彭浩翔
電影導演