法國日前只能打和南韓，相信焦點除咗「法蘭西軍團」表現令人失望之外，韋拉上半場頭槌攻門被判唔入都算係賽後話題，經過電視重播，呢球波的確應該係入咗，但偏偏球證、旁證都睇唔到，南韓繼上屆有主場之利後，又一次得到球證幫助唔使輸，認真有運行，唔到你唔服！不過，南韓最後1場要對防守能力唔差嘅瑞士，睇吓到時又會唔會有球證幫助，闖入16強。