世界盃各球隊已先後亮相，亞洲球隊全部落足力，可惜水準與列強有距離，唯獨一隊韓國仍有機會。捷克球員表演出色，但尼維特年紀有番咁上下，唔知走唔走得足咁多場。瑞典的雙天龍格保與拿臣你交波畀我，我交波畀你，總欠臨門一腳。葡萄牙的C朗拿度實在太個人主義兼死扭爛扭，費高與狄高冇晒佢符，反而西班牙幾有隊型，踢波始終都係踢成隊，有隊型先有前途。
法國隊的代名詞是無奈，經常性見到施丹都係一個攰樣，亨利又患了大賽冇波入症，風光不再。德國隊一時一樣，有時主攻，有時主守，未出現風格，睇嚟奇連士文都未揸定主意。另一位球星領隊雲巴士頓率領荷蘭隊，橙色軍團雖然贏波但總是顯得吃力，除非雲佬與洛賓越踢越出默契，如果唔係，雲達沙守得幾好都冇用。英格蘭與意大利隊都是少爺兵，落場搏一陣就開始行行企企，其他球隊對住呢兩隊又特別眼紅，「咁靚仔吖嗱！D&G球衣吖嗱！阿曼尼球衣吖嗱！縮腳！」全部靚仔都錫身，希望頸粗過頭的朗尼能帶番起英格蘭的拼搏精神。巴西隊最詐詐帝帝，大把在手，唔知邊場先等到全隊球星忘我合作演出。阿根廷隊冇得傾，Keyman話齋成隊波好似浪一樣冚向對手，精彩！要攞世界盃最難之處是要踢好多場波，球員再叻都只係血肉之軀，會受傷又會攰，所以領隊的調配至為重要，曾特首提醒球迷睇波要留意領隊表現，唔知曾特首嘅心水領隊又係邊一位呢？