森美同小儀呢排因為喺商台節目《架勢堂》度舉行咗個「我最想非禮嘅香港女藝人選舉」而搞到一鑊泡，商台要佢哋停薪留職兩個月，廣管局日前則判商台罰錢14萬。雖然森美要暫時休息，但仍要履行之前接咗嘅工作。好似佢同薛凱琪（Fiona）、日籍男星鈴木仁主演嗰部《新紮師妹3》，下星期二喺觀塘apm舉行首映禮，森美都會照樣出席。
《藝伎》攞靈感
講番呢部戲，森美都算好大犧牲，話說有幕講佢同Fiona等人夾計整蠱鈴木仁，森美決定將自己塊面搽到白一白，扮日本女鬼嚇對方，聽森美講，佢係因為睇咗章子怡部《藝伎回憶錄》（MemoirsofaGeisha）而得到靈感喎。森美呢期是非纏身，唔知化完個鬼樣之後，可唔可以驅走啲衰氣呢？而戲中Fiona一直好冧鈴木仁，當森美扮鬼出嚟嚇人嗰陣，Fiona乘機攬實鈴木仁唔放囉！
