Game事撻：韓國MJ殺入PSP　打機賺錢　為睇RainMV

嘩，世盃打足一個月，IT妹個男友話要成班麻甩佬煲波喎，今晚又冇我份！好彩，下個月世盃到尾聲，輪到我唔得閒喇，事關小妹至冧嘅Rain打正牌頭出Game，有大量MV睇之餘仲有得玩遊戲，實行揸住部PSP同韓國MJ「互動」一番，稍為彌補吓我心靈嘅創傷！

記者︰陸俊雄
攝影︰譚盈傑
ImageGirl︰Ruby

呢款PSP遊戲名為《RainWonderTrip》，顧名思義全Game都係圍繞Rain嘅事件嚟玩，最新鮮滾熱辣梗係最新嘅MV《BadBoy》！呢套MV來頭唔嘢小，遠赴美國拍攝兼使咗成千萬港紙！Rain仲以一身監犯Look在獄中大跳勁舞，又玩埋怪醫秦博士髮型上身，最後被差佬圍捕兼一槍打瓜埋㖭，精采程度簡直媲美真正電影。
遊戲內亦收錄Rain嚟香港時嘅絕密片段，睇落開發商都幾照顧香港Fans。最有趣係Rain上次嚟香港時，曾施調虎離山計，用「假Rain」避開記者追訪，遊戲裏頭更大爆Rain做呢個冒牌貨嘅形象指導，認真抵死。

■遊戲內收錄大堆Rain影片，雖然試玩時係日文，不過行貨推出時會換成全中文。

賺錢送禮畀偶像

在《RainWonderTrip》裏，玩家扮演Rain嘅忠實Fans，偶像做巡迴演唱，佢去邊你就跟到去邊，了解Rain嘅工作日程之餘，仲可同Rain玩互動遊戲，睇佢鏡頭後嘅一面。
遊戲中有個SuperRainTV電視台模式，提供ShopShopRain、IDoTheatre、SkyMusicHour、QuizBillionaire和DailyHoroscope五大頻道；透過QuizBillionaire答問題賺錢，跟手就可買禮物送畀偶像，不過啲問題係超級Fans先識答嗰種，一啲都唔容易！又可以在SkyMusicHour和IDoTheatre睇偶像新舊MV，以及拍廣告和劇集時嘅幕後花絮，Fans肯定滿足到爆。
除咗上述嘅MiniGame，玩家仲可以同Rain猜包剪揼，又或跟偶像學講日文（居然唔係韓文！），認真多元化。

■真人Rain同你猜包剪揼，羨慕死人。

■貼身追隨Rain巡迴演唱之旅。

■相簿入面大把Rain靚相慢慢睇。

■錢唔多，平平哋送粒糖一樣受！

■歌迷為偶像賀生日，好sweet呀！

印度西施搞笑占卜

5條頻道中仲有條DailyHoroscope；簡單啲講係玩占卜，所有紙牌圖案當然變晒Rain嘅帥哥樣啦！入面有兩個占卜師，一個係印度西施，飛隻牌出嚟好有氣勢；一個係玩水晶球嘅巫婆，全都係必玩嘅搞笑環節！
用高價搵人氣天王Rain做主角，原來係日本兩大巨頭合併嘅BandaiNamco作品。呢隻係佢哋首款PSPGame，目標清晰明攻女性市場，7月6日喺東南亞同步推出，香港仲有繁體中文版㖭。
今次日本仔睇中Rain嘅超強人氣，可謂繼02年世盃後，再一次日韓聯手，誓要掀起女性PSP遊戲熱潮，挑戰NDS女性遊戲較多較強嘅局面！