四年一度的世界盃已經進入白熱化階段，32隊球隊已經全部登場，球星雲集的上屆冠軍巴西，昨日凌晨於F組出擊生擒澳洲。以241票成為本報「最想同邊個女星睇波」選舉亞軍的葉璇，更抽空與一班《蘋果》讀者到卡拉OK觀看大戰。身為巴西擁躉的葉璇對球隊以2:0殺敗對手，十分興奮，她希望巴西隊繼續做長勝軍，六度稱霸世界盃。
本報娛樂名人版早前舉辦的「最想同邊個女星睇波」網上投票，2,228讀者投下神聖一票，其中獲241票成為第二名的葉璇，昨日凌晨在尖沙嘴加州紅卡拉OK內，與曾投她一票的10位《蘋果》讀者及他們的友伴，一起欣賞巴西對澳洲的分組賽，巴西隊擁躉葉璇穿上黃綠色球衣到場，與fans一邊睇波，一邊吃零食，氣氛猶如球場一樣熱鬧，結果巴西隊以2:0勝出晉身16強，全場球迷情緒高漲。
男Fans冷落未婚妻
葉璇前日剛拍完正在播映的亞視劇集《情陷夜中環2》，睡了幾個小時便趕來看世界盃，她說：「世界盃開鑼時，我要趕拍劇，根本都冇時間睇波，𠵱家正好輕輕鬆鬆同fans一齊睇，真係好開心。」
葉璇因為靚仔球星卡卡而支持巴西隊，其實她對足球並不太認識，所以坐在她身邊，攜同害羞未婚妻到場觀看球賽的張先生即自告奮勇，擔任葉璇的私人評述員，熱情的張先生明顯冷落未婚妻Maria，因為球賽進行期間，張先生不停解話，Maria則被發現打瞌睡。事後Maria說：「其實我哋一早都鍾意睇Michelle（葉璇）做戲，晚晚捧場睇《情陷2》，我一啲都唔介意未婚夫少咗照顧我，咁先證明佢有紳士風度嘛！」
肥哨失機勁肉緊
葉璇與讀者們投入賽事，看到巴西前鋒阿祖安奴為球隊領先，大家都打響吹氣棒為巴西隊吶喊助威，不過看到前鋒朗拿度略為肥胖的身形及多次失手時，葉璇都咬牙切齒。
問到葉璇覺得巴西隊昨日賽事表現時？她說：「我聽到電視嘅評述員形容朗拿度『千鈞一髮，射中空氣』呢句形容詞，好生鬼，其實朗拿度真係需要減吓肥，不過佢始終係巴西人民心目中嘅英雄，呢樣係毋庸置疑。」葉璇又大讚巴西中場卡卡，她說：「佢年輕又有拼勁，喺球場上好有魅力。我希望巴西隊表現愈來愈好，場場都贏。」
採訪：比華利、王崇穎、馬建華
攝影：林德雄、陳偉權
協力：羅慧敏
場地：加州紅卡拉OK（美麗華商場）
葉璇髮型：JayCheung@Hair
