與高科技基金創辦人、律師、分析師食飯傾偈，聽吓屬於美國甲組級嘅人馬講股票，果然學到嘢。呢類人第一個特點就係學歷高，譬如創辦人K先生係柏克萊電機/電腦系畢業，SantaClara大學（私立）MBA，做過電腦系統公司。分析師係俄國人，在聖彼得堡大學畢業，有電腦碩士學位。到咗美國，喺SantaClara再攞電機工程、MBA兩個碩士學位，又到牛津大學讀完高級管理課程，曾在半導體公司工作。佢哋間公司啲基金經理、分析師，個個有相同背景，就係讀完電機工程、電腦、數學、醫科之後再加上一個MBA學位。左丁山周時勸啲世姪、世姪女：「如果你哋喺中學讀理科，入大學唔使咁快讀會計、工管，不妨讀完理科、工程學位之後，先至再讀MBA。咁樣嘅學位組合，先至容易在跨國公司、美國基金內搵到好職位。」但大部份人都費事諗咁多，一於入咗商學院先，唔係話唔好，視野未免狹窄啲。
左丁山全無科技理工科背景，聽佢哋講科技股之選擇，如何判斷科技股好壞，得個聽字，譬如Corning，好似係玻璃公司噃，點解會係高科技？K先生話康寧製造平面電視與顯示器嘅玻璃基板，因市場對平面電視需求強烈，康寧嘅生意好好。中國科技股方面，佢哋已經買入百度、中移動、廣輝電子與中芯國際集成電路，咦，中芯別名係「人人傷心」，上市後股價一路潛水噃，百度係中國Google，中移動就人人都識啦，廣輝電子（Quanta）係乜東東，真係唔知。K先生話佢哋基金係長期投資者，好有耐性，回報率一向好滿意。
K先生原來喺矽谷出世，在矽谷長大，讀書、工作亦在矽谷，碰啱好多好多巴閉高科技公司都發源於矽谷，所以K先生對高科技發展瞭如指掌，創辦基金公司時就以矽谷為基地。佢話：「我成世人住在矽谷灣區，以為全世界都係咁美麗，直至第一次去紐約，先至知道大城市可以咁嘈，咁污染，所以點都唔會離開矽谷呢塊福地！」