記者昨日就霆鋒和栢芝復合一事進行街訪，市民普遍都不看好這段戀情。
劉小姐（24歲）
「論外形我覺得佢哋都算係靚仔靚女，所以可以話襯，應該夾得好好。如果單計外形係冇問題嘅，但如果計埋報道所講嘅，我就唔睇好佢哋喇。」
王小姐（21歲）
「一定唔睇好，佢哋之前喺埋一齊，跟住又分過手喎，咁即係代表唔夾啦。如果話佢哋復合，我就唔係咁睇好喇，唔知係咪佢兩個性格上出現問題，又或者大家係性格上唔夾，所以先分手。」
洪小姐（20歲）
「我唔係幾睇好霆鋒同栢芝復合喇，𠵱家啲人感情好似都唔係咁穩陣，普遍嚟講大家都係咁。尤其係藝人，經常個個都話復合，都唔知係咪嘅。其實都好似個個感情都唔係咁穩定，唔知佢哋邊方面出現問題，但係都好似唔係咁夾到。」
