侍仔：咁快就去到最後一輪分組賽，今晚有4場波，你哋班賭徒一定忙到死。
菠蘿文：呢個就一定啦，個電視要擰來擰去。但我就好簡單啫，淨係一條單W嘅4串1：哥斯達黎加W串德國W串千里達W串瑞典W，4關共有50倍㗎。
招積域：你都好博吓喎，買一條50倍嘅4串1，重要有冷門，乜你好等錢使咩？
菠蘿文：分組賽最後一場，就乜都可以發生㗎啦，波蘭今屆輸到阿媽都唔認得，上屆就話初時未ready打世界盃，再加上美國放水先可以贏3:0啫，哥斯達黎加何嘗唔係要踢爭氣波？但波蘭對住踢法相近嘅都贏唔到，哥斯達黎加博得過。
招積域：咁千里達點解可以贏巴拉圭呢？唔係靠約翰吓話？巴拉圭一定搵千里達祭旗啦，所以我認為會係大勝格，3:0波膽係首選。
侍仔：呢類咁博嘅我唔玩，我鍾意兩隊接近實力嘅，瑞典對英格蘭唔錯呀，兩隊波成日打和，英格蘭又踢悶波，一味斬斬斬，瑞典嘅前鋒又無料到，唔係老就係無態，一於買佢0:0波膽。
招積域：但英格蘭唔係要走線嘅咩？德國嗰場踢完3個鐘之後先到英格蘭開波，睇定嚟食都可以啦。呢場我𠵱家唔買住，德國嗰場踢完先下注。
菠蘿文：唔使咁做喎，德國話咗畀我知，佢哋對厄瓜多爾唔會留力，一定贏。主場作戰，點可以走線咁乞人憎？輸咗咪好無面？
侍仔：我仍然堅持己見，英格蘭和再加波膽0:0。
文：高洛文