世界盃今晚開始最後1輪分組賽，爭出線、算死草、玩走線，每隊各有目的。今晚厄瓜多爾對德國，期待厄軍有好表現，為球迷帶來驚喜！
今晚首先踢A組的賽事，之後先到英格蘭上場。論走線，B組睇住A組成績來踢，英格蘭為避德國，最後賽果之微妙，各位心中有數！如果以上推論合理，厄瓜多爾呢場波，其實兩隊根本無必要出力踢，可以大打風流波，實行以和為貴！
厄軍球員體能贏晒
如果唔理以上推論，以波論波，我都一樣鍾意厄瓜多爾！呢隊波，完全係非洲波嘅風格，個個球員都大大隻，有身材同有體能。現代足球唔可能空講技術，而我對厄軍教練梳亞雷斯好有信心，因為佢早已經搵咗喺曼聯打工同做緊助教嘅朋友一齊研究歐洲波嘅弱點！開波前做足準備，我有信心厄軍今晚可以戰勝德國，再創奇迹！
如果厄軍首名出線，英格蘭極有可能會走線，想喺16強對住厄軍！但我相信以英軍現時嘅實力，都真係未必贏到厄軍！英格蘭，練多幾年波先來踢世界盃啦！
周鵬商業一台《長傳急攻一粒鐘》主持今日播放時間晚上8:00pm-9:00pm